لا ضاق صدرك عالي الصووت جــــــره

من طرف **ام عبادي** الأربعاء يناير 19, 2011 8:45 pm

لآضاق صدرك عالي الصوت جره
لو كان قلبك ما يطاوعك مسرور

دنياك لو تسوى من الحِزن ذرّه
ما كــان تاليـهــا توابيت وقبـــور

وما كــان للكــافــر بعـمــره مـســره
وما شفت في ملكه ملايين وقصور

العمـر يمضي بين حلــوه ومــره
والموت حق وقابض الروح مأمور

دام الحـيــاه الـفــانيــة مستقــره
ورزقك يجيك وبين الأجواد مستور

لاتنشـغــل بالـوقـت بــرده وحــره
واحذر تصير بقسمة الناس مقهور

وحكــم القدر لاجــاك خـيـره وشــره
أشكر عظيم الشان والذنب مغفور

والمجلس اللي يزعجك لا تمره
خله تراك بشوفته منت مجبور

والرجل سقها في صحاصيح بره
ومد النظر مابين ريضـان وزهــور
لا صـار وجـه القــاع ما فيه جــره
والمشي حافي والثرى توممطور

ســاعــات صمــتٍ مــا وراهــا مضــره
تسوى الكلام اللي به إذنوب وإشرور

أطلق خيالك وأترك النفس حــره
وخل الطبيعه في حياتك لها دور

وبالليــل لا بــانت نـجــوم الـمـجّــره
أذكر بديع الخلق بـِ إحـساس وشعور

واســجــد لرب الكُــون مــره ومــره
وإحفظ لسانك وأترك الكذب والزور

وفــروض ربــك خـلــها مـستمــره
وطاعتك لا يدخل بها نقص وقصور